Apostamos pola “cooperación na cooperación” cuns obxectivos comúns de equidade, xustiza e sostibilidade.

Formamos alianzas e redes de apoio mutuo con organizacións afíns, feministas, ecoloxistas, populares, campesiñas, indíxenas en todo o mundo, principalmente, en territorios de América Latina e no noso territorio, na procura de alternativas ao modelo de desenvolvemento hexemónico.

COOPERACIÓN INTERNACIONAL

Nos países onde cooperamos, apoiámonos e traballamos con entidades comprometidas socialmente, transformadoras e activamente críticas coa súa propia sociedade, xeradoras de espazos sociais participativos, con campos e liñas de actuación coincidentes coas nosas propias liñas de traballo, coas que queremos construír relacións igualitarias, bidireccionais e de apoio mutuo.

A través deste traballo de Cooperación Solidaria, viñemos acompañando moitos e variados procesos de transformación social, primeiro en Centroamérica, despois en Cuba, na zona andina , en Marrocos e en Brasil en apoio do MST, así como a solidariedade coa nosa fronteira Sur.

Tamén nos incorporamos a redes internacionais de incidencia social e política, contra o poder das transnacionais, os tratados de comercio e investimento en curso, as políticas migratorias da UE e os seus estados membros, pola soberanía alimentaria, o internacionalismo feminista, etc.

COOPERACIÓN ESTATAL

Entrepobos tamén forma parte de plataformas de ámbito estatal no eido dos movementos feministas, pola soberanía alimentaria, contra os tratados de comercio e investimento, pola banca e as finanzas éticas e da incidencia nas políticas de cooperación.

Nos nosos territorios colaboramos con outras entidades, colectivos e movementos sociais, coas que temos puntos de vista e acción comúns. Establecemos alianzas, xeitos de colaboración mutua e plataformas de acción con outras organizacións de aquí. Nalgunhas ocasións mediante alianzas estables e xerais, mentres que noutros casos consisten en acordos específicos de colaboración por temática ou por país. Apostamos pola “cooperación na cooperación” e resistímonos a entrar nas dinámicas competitivas.

Sabemos que as organizacións locais son as que mellor coñecen as respostas e os camiños da emancipación dos seus pobos.