Dela forman parte todas as persoas asociadas, é o órgano de máxima decisión da Asociación, nela xéranse procesos de reflexión, debate e acordos colectivos de todos os temas que presidirán o día a día da nosa actividade durante o ano seguinte.

Entre as nosas asembleas anuais funciona unha Xunta Directiva composta polo Presidente/a, Secretario/a xeral e Tesoureiro/a, ademais das portavocías que cada organización territorial propón para a súa representación.

A Xunta Directiva é elixida anualmente pola Asemblea Xeral. Será renovada na súa totalidade no prazo de dous anos, podendo ser reelixibles indefinidamente.

Temos unha Oficina técnica con persoal profesional encargado das áreas de proxectos de cooperación, educación, comunicación e incidencia e administración. A nosa Asemblea Xeral marca as liñas de traballo e a Xunta Directiva realiza o seguimento permanente da oficina técnica. Neste ámbito temos como normas a austeridade e a eficiencia no emprego dos recursos humanos e técnicos; o funcionamento democrático e en equipo na xestión; e unhas condicións laborais coherentes cos nosos principios, no tocante a dereitos laborais e á equidade de xénero.

Os e as cooperantes que nos representan sobre o terreo coordínanse a través da oficina técnica, cos mesmos criterios, pero atendendo tamén ás especiais circunstancias en que desempeñan o seu traballo.

A xestión económica é transparente, sometida a unha auditoría externa, o seu seguimento realízase periodicamente pola Xunta Directiva e difúndese na nosa memoria anual.